അയഥാര്‍ത്ഥം

സ്നേഹം അയഥാര്‍ത്ഥമായ എന്തോ ഒന്നാണ്..
ചിരിച്ചുകൊണ്ട് നിസ്വാര്‍ത്ഥമായി
അതുനമ്മില്‍ ചലനങ്ങള്‍ സൃഷ്ടിക്കും..
ഒടുവില്‍ അന്യം നിന്നുപോയ ഒരുവളുടെ അന്തസത്തയെ
വര്‍ണ്ണനൂലിനാല്‍ വിവസ്ത്രയാക്കുന്ന ലാഘവത്തോടെ 
വിദൂരതയിലേക്ക് വലിച്ചെറിയും...!!
______________________________________(പ്രിയദര്‍ശിനി പ്രിയ)

കാര്‍മേഘങ്ങള്‍

കാര്‍മേഘങ്ങളെക്കാള്‍ വന്‍സംഭരണികള്‍
നേത്രങ്ങളായിരുന്നു..,
പെയ്യാതെ കറുത്തിരുണ്ട മിഴികളില്‍
ചുവന്നൂറിയത്
ഇനിയും കണ്ടുതീരാത്ത സ്വപ്നങ്ങളും....!!
____________________________________(പ്രിയദര്‍ശിനി പ്രിയ)

ഞാനും നീയും..

ചിന്തകള്‍ കൂടിക്കലരുന്നതേയില്ല
ഞാനും നീയും വേറെവേറെ.....!!

പെയ്തൊഴിയാതെ..

പുറത്തൊരു മഴ തോരാതെ പെയ്യുന്നുണ്ട്..
അകച്ചൂടില്‍ ഉഷ്ണിച്ച പെണ്ണിന്‍റെ
കണ്ണില്‍ മഴക്കോള് മൂടിയ വാനം...
___________________________________(പ്രിയദര്‍ശിനി പ്രിയ)

പ്രണയം...

നോവിക്കുന്ന കളിപ്പാട്ടങ്ങള്‍ക്കിടയില്‍ മത്സരിച്ചുതളരുമ്പോള്‍
അലിവോടെ നെറുകയില്‍ തലോടുന്ന കരങ്ങളാവണം
ഞാനാഗ്രഹിക്കുന്ന എന്‍റെ പ്രണയം... !!

നിര്‍ജ്ജീവം...!

ഏകാന്തതടവറ സ്വയം വിധിച്ചതാണ്...
ഇവിടെ ഭീരുവിന്‍റെ സ്വപ്നങ്ങള്‍ക്ക്
ഡസ്റ്റ്ബിന്നിലെ നാപ്ക്കിന്‍റെ വിലപോലും ഉണ്ടാവില്ല... !!

വൈകിയ തിരിച്ചറിവുകള്‍
എന്നും ബോണ്‍സായ് വൃക്ഷങ്ങളെപ്പോലെയാണ്... ;
സ്വയം മുരടിച്ചുപോയതും
ചുറ്റുപാടുകളെ സന്തോഷിപ്പിക്കുന്നതും... !!

_______________________________(പ്രിയദര്‍ശിനി പ്രിയ)

മൌനി

സത്യം എല്ലായ്പ്പോഴും അലര്‍ജിയാണ്..
ഒളിച്ചോടല്‍ നീ പതിവാക്കിയപ്പോള്‍ ഞാന്‍ ചിന്തിച്ചതാണ്...
മൌനം മറയാക്കി നീയെന്‍റെ വാക്കുകള്‍ക്ക് തടയിട്ടു...
വിങ്ങിയ അക്ഷരങ്ങള്‍ ഉള്ളില്‍ക്കിടന്ന് മരവിച്ചുതുടങ്ങിയപ്പോള്‍
പിന്നെപ്പിന്നെ  ഞാനും മൌനിയായി...
_______________________________ (പ്രിയദര്‍ശിനി പ്രിയ)