ഞാനും നീയും..

ചിന്തകള്‍ കൂടിക്കലരുന്നതേയില്ല
ഞാനും നീയും വേറെവേറെ.....!!

പ്രണയം...

നോവിക്കുന്ന കളിപ്പാട്ടങ്ങള്‍ക്കിടയില്‍ മത്സരിച്ചുതളരുമ്പോള്‍
അലിവോടെ നെറുകയില്‍ തലോടുന്ന കരങ്ങളാവണം
ഞാനാഗ്രഹിക്കുന്ന എന്‍റെ പ്രണയം... !!

നിര്‍ജ്ജീവം...!

ഏകാന്തതടവറ സ്വയം വിധിച്ചതാണ്...
ഇവിടെ ഭീരുവിന്‍റെ സ്വപ്നങ്ങള്‍ക്ക്
ഡസ്റ്റ്ബിന്നിലെ നാപ്ക്കിന്‍റെ വിലപോലും ഉണ്ടാവില്ല... !!

വൈകിയ തിരിച്ചറിവുകള്‍
എന്നും ബോണ്‍സായ് വൃക്ഷങ്ങളെപ്പോലെയാണ്... ;
സ്വയം മുരടിച്ചുപോയതും
ചുറ്റുപാടുകളെ സന്തോഷിപ്പിക്കുന്നതും... !!

_______________________________(പ്രിയദര്‍ശിനി പ്രിയ)

മൌനി

സത്യം എല്ലായ്പ്പോഴും അലര്‍ജിയാണ്..
ഒളിച്ചോടല്‍ നീ പതിവാക്കിയപ്പോള്‍ ഞാന്‍ ചിന്തിച്ചതാണ്...
മൌനം മറയാക്കി നീയെന്‍റെ വാക്കുകള്‍ക്ക് തടയിട്ടു...
വിങ്ങിയ അക്ഷരങ്ങള്‍ ഉള്ളില്‍ക്കിടന്ന് മരവിച്ചുതുടങ്ങിയപ്പോള്‍
പിന്നെപ്പിന്നെ  ഞാനും മൌനിയായി...
_______________________________ (പ്രിയദര്‍ശിനി പ്രിയ)
            

വിശ്വാസം

നഷ്ടപ്പെട്ട വിശ്വാസ്യത നേടിയെടുക്കുകയെന്നത് അപ്രായോഗികമാണ്... കൂടെ നഷ്ടപ്പെട്ട സ്നേഹവും.... പക്ഷെ ഞാനെന്‍റെ വിശ്വാസത്തെ ഒരു ബലിക്കല്ലിനും വിട്ടുകൊടുക്കേണ്ടതില്ല.. എന്‍റെ സ്നേഹത്തില്‍ ആത്മാവുള്ളിടത്തോളം കാലം....!!
_______________________________ ( പ്രിയദര്‍ശിനി പ്രിയ )

എനിക്ക് കഴിയില്ല...

ഞാനെന്‍റെ വീട്ടിലേയ്ക്ക് നിങ്ങളെ ക്ഷണിക്കാം..
ഞാനുണ്ണുന്ന പാത്രത്തില്‍ ഭക്ഷണം വിളമ്പിത്തരാം.. 
മാറ്റിയുടുക്കാന്‍ ഞാനെന്‍റെ വസ്ത്രങ്ങള്‍ നല്‍കാം.. 
ഉറങ്ങാന്‍ എന്‍റെ മെത്തയും..
പക്ഷെ ഒരിക്കലും നിങ്ങളെന്നോട് എന്‍റെ പ്രണയത്തിന്‍റെ , 
എന്‍റെ ജീവിതത്തിന്‍റെ പങ്കുമാത്രം ചോദിക്കരുത്...! 
നല്‍കാനെനിക്ക് കഴിയില്ല...!
കാരണം എന്നിലെ ഏകവ്യക്തി ആഗ്രഹിക്കുന്നത് ഒരിക്കലും പങ്കിട്ടുപോവാത്ത ശ്രീരാമസ്നേഹമാണ്...!!
____________________________________ ( പ്രിയദര്‍ശിനി പ്രിയ )

ലവ്....

ജീവിതത്തില്‍ ഓരോതവണയും ഞാന്‍ നിന്നോട് യാത്ര ചോദിക്കാറുണ്ട്...
എന്നും ആദ്യം ഒന്നില്‍ നിന്ന് തുടങ്ങും...
കഴിഞ്ഞ കാലവും കൊഴിഞ്ഞ പ്രതീക്ഷകളും നാളേയ്ക്കുള്ള ആശംസകളും നിറച്ച്...
പിന്നീട് പതിയെ പതിയെ അതവസാനിക്കുക ഒരു ചുംബനത്തിലാവും....
മാറ്റിവെയ്ക്കപ്പെട്ട യാത്രയില്‍ തുടങ്ങി മറ്റൊരു യാത്രാരംഭം വരേയ്ക്കും അതങ്ങനെ പടര്‍ന്നുപടര്‍ന്ന്‍.......!!

പെണ്ണേ.......!!

" സങ്കല്പങ്ങളിലൂടെ മാത്രം ജീവിക്കുന്ന ഒരു പെണ്ണ്... തന്‍റെ സ്വപ്നങ്ങളില്‍ വരച്ചുചേര്‍ത്ത വര്‍ണ്ണങ്ങള്‍ക്ക് യാഥാര്‍ത്ഥത്തില്‍ ഇന്‍വെര്‍ട്ട് കളേഴ്സ് നല്‍കുന്ന നെഗറ്റീവ് ഇംപാക്റ്റാണെന്നുള്ള തിരിച്ചറിവ്... എന്നിട്ടും അടിപതറിപ്പോവാതിരിക്കാന്‍ കണ്ണടച്ചിരുട്ടാക്കുന്ന കുസൃതിക്കുട്ടിയുടെ കൌശലം... "

അബൌട്ട് മീ എന്ന തലക്കെട്ടില്‍ അവള്‍ എഴുതിച്ചേര്‍ത്ത വാചകങ്ങള്‍ക്ക് ഉപ്പുകാറ്റിന്‍റെ ശീതളിമയുണ്ടായിരുന്നു... !

എന്തിന്?

അതിജീവനത്തിനു വേണ്ടി സന്ധികള്‍ ചെയ്യാതെ 
അതിസങ്കീര്‍ണമായൊരു സാഹസികയാത്ര... 
ജീവിതത്തോടുള്ള വ്യക്തമായ കാഴ്ച്ചപ്പാട്... 
അസാധാരണവ്യക്തിത്വം കാംക്ഷിച്ച് 
പൊങ്ങിപ്പറക്കാന്‍ ശ്രമിക്കുമ്പോഴെല്ലാം 
ഒരു സാധാരണപെണ്ണായി നിലംപതിക്കുന്ന യാഥാര്‍ത്ഥ്യം... വേദനയോടെയാണെങ്കിലും തിരിച്ചറിയുന്നുണ്ട് 
അസ്വാതന്ത്ര്യത്തിന്‍റെ കയ്പ്പ്... 
എന്‍റെ വാക്കില്‍ എന്‍റെ ചിന്തയില്‍ 
എന്‍റെ പ്രവൃത്തിയില്‍ ഞാനില്ലെങ്കില്‍ 
പിന്നെയീ " ഞാന്‍ " എന്തിന്....? 
_______________________________________________